कोट्यवधींची विनापरवाना, कालबाह्य औषधे जप्त

मुंबई, ता. ४ : अन्न व औषध प्रशासनाने मालाड पश्चिम येथील प्रांदा बायोफार्मा प्रायव्हेट लिमिटेडच्या गोदामावर सापळा रचून छापा टाकला. या छापेमारीत कालबाह्य केसांचे तेल, विविध आजारांवरील औषधे आणि कोट्यवधी रुपयांची विनापरवाना औषधे सापडली असून, ३१७ बॉक्समधील सर्व अवैधसाठा गुरुवारी (ता. ३१) जप्त करण्यात आला आहे.

जिल्हा संनियंत्रण व तक्रार निवारण समितीचे सदस्य भिमेश मुतुला यांनी गोपनीय माहितीच्या आधारे चौकशी करून प्रांदा बायोफार्मा प्रायव्हेट लिमिटेड कंपनीकडून केसांचे तेल मागवून त्याच्या कालबाह्यतेचा प्रकार उघडकीस आणला. त्यानंतर याबाबतचे पुरावे अन्न व औषध प्रशासनाचे आयुक्त राजेश नार्वेकर यांच्याकडे सादर केली. या माहितीवर तातडीने ‘एफडीए’ने ही कारवाई केली. ‘भविष्यात जनतेच्या आरोग्याशी खेळणाऱ्या कंपन्यांवर कठोर कारवाई करण्यात यावी,’ अशी मागणी रुग्णसेवक भिमेश मुतुला यांनी या वेळी केली.