शहरातील दोन स्वतंत्र अपघातांत दोन ठार, तिघे जखमी
मुंबई, ता. ५ ः बाबुलनाथ मंदिर परिसरात पदपथावर झोपलेल्या तरुणाला मर्सिडीज कारने चिरडले. तर विक्रोळी येथे भरधाव रिक्षाच्या धडकेत एक व्यक्ती गंभीर जखमी झाला. या जखमीला रुग्णालयात नेताना रिक्षाचालकाने अन्य तीन पादचाऱ्यांना धडक दिली. या दोन्ही अपघातांना जबादार असलेल्या वाहनचालकांवर अनुक्रमे गावदेवी आणि विक्रोळी पोलिसांनी गुन्हा नोंदवून पुढील कायदेशीर कारवाई सुरू केली आहे.
बाबुलनाथ मंदिराजवळील अपघात ३१ जुलैच्या रात्री घडला. मंदिराजवळील ओरिएंटल क्लबच्या पदपथावर जगदीश नावाचा तरुण झोपला होता. क्लबमध्ये येणाऱ्या एका मर्सिडीज कार पदपथावर चढली आणि जगदीश चिरडला गेला. अपघातानंतर मर्सिडीज कारचालकाने तेथून पळ काढला. १ ऑगस्टच्या सकाळी हा तरुण बेशुद्धावस्थेत आढळल्याने त्याला तातडीने नायर रुग्णालयात नेण्यात आले. तेथे तो मृत असल्याचे स्पष्ट झाले. गावदेवी पोलिसांनी घटनास्थळावरील सीसीटीव्ही पाहिले तेव्हा अपघातात त्याचा मृत्यू झाल्याची बाब पुढे आली.
दुसऱ्या घटनेत शनिवारी संध्याकाळी सातच्या सुमारास जोगेश्वरी-विक्रोळी जोडरस्त्यावरील बिंदू माधव चौकात (विक्रोळी) सिग्नलजवळ उभ्या एका तरुणास भरधाव रिक्षाने धडक दिली. अपघातात हा तरुण गंभीर जखमी झाला. तेथे तैनात पोलिसाने जखमीस त्याच रिक्षात घालून महात्मा फुले रुग्णालयात नेण्याचा निर्णय घेतला. रुग्णालयाच्या वाटेवर असताना या रिक्षाचालकाने रस्त्यावरून पायी जाणाऱ्या अन्य तिघांना धडक दिली. त्यानंतर ही रिक्षा रुग्णालयात पोहोचली तोवर पहिल्या अपघातात जखमी झालेल्या तरुणाचा मृत्यू झाला होता.