तोतया पोलिसाचा सराफाला गंडा
पोलिस चौकीवर बोलवून फसवले

मुंबई, ता. ५ ः पोलिस असल्याचे भासवत सेवानिवृत्त वरिष्ठ अधिकाऱ्याला भेट द्यायची म्हणून एका भामट्याने सराफाकडून दोन तोळे सोने घेत पोबारा केला. विशेष म्हणजे हे सोने त्याने व्ही.पी. रोड पोलिस ठाण्याच्या अंतर्गत येणाऱ्या दोन टाकी पोलिस चौकीसमोर घेतले. ही घटना सोमवारी (ता. ४) दुपारी घडली.
याप्रकरणी सोमवारी व्ही.पी. रोड पोलिसांनी अनोळखी व्यक्तीविरोधात गुन्हा नोंदवून तपास सुरू केला आहे. पोलिसांनी घटनास्थळावरील सीसीटीव्ही चित्रण पाहून आरोपीची ओळख पटविण्याचे प्रयत्न सुरू केले आहेत. झवेरी बाजार येथे आस्पेक्ट बुलियन अँड रिफायनरी कंपनीचे कार्यालय आहे. एका व्यक्तीने कंपनीच्या ग्राहक सेवा क्रमांकावर संपर्क साधून स्वतःची ओळख उपनिरीक्षक सागर शिंदे अशी सांगितली. निवृत्त झालेल्या वरिष्ठ अधिकाऱ्यांचा निरोप समारंभ असून त्यांना भेट देण्यासाठी दोन तोळे सोने हवे आहे, अशी मागणी केली. पुढे या व्यक्तीने तो दोन टाकी पोलिस चौकीत आणून द्याल का, अशी विनंती केली. कंपनीने सोने घेऊन शिपायाला तेथे पाठवले असता शिपायाला समोरील हॉटेलमध्ये बसायला सांगितले. मग एका व्यक्तीने तेथे येऊन त्याच्याकडील सोने घेत आणि ‘शिंदे साहेब तुम्हाला पुन्हा फोन करतील, तेव्हा चौकीत जा आणि पैसे घ्या,’ असे सांगत ती व्यक्ती तेथे निघून गेली. नंतर शिपाई पोलिस चौकीत गेला असता सागर शिंदे नावाचा अधिकारी नियुक्त नाही, असे त्यास समजले.