धारावीतील पात्र व्यावसायिकांना बांधकाम खर्चात मिळणार अतिरिक्त क्षेत्रफळ
२४ ऑगस्टपर्यंत संमतीपत्र दाखल करण्याचे आवाहन; व्यावसायिकांना मोठा दिलासा
सकाळ वृत्तसेवा
मुंबई, ता. ६ : धारावी पुनर्विकास प्रकल्पातील पात्र औद्योगिक आणि व्यावसायिक गाळेधारकांना मोठा दिलासा मिळणार आहे. येथील पुनर्विकासात औद्योगिक आणि व्यावसायिक गाळेधारकांना २२५ चौरस फूट क्षेत्रफळाचा मोफत गाळा मिळणार आहे. त्यापेक्षा अतिरिक्त क्षेत्रफळाचा गाळा हवा असले तर त्यांच्याकडून वाढीव क्षेत्रफळाचा केवळ बांधकाम खर्च घेतला जाणार आहे. त्यासाठी त्यांनी २४ ऑगस्टपर्यंत डीआरपीकडे संमतीपत्र दाखल करावे लागणार आहे. त्यामुळे वाढीव क्षेत्रफळाचा गाळा घेऊ इच्छिणाऱ्या व्यावसायिकांसाठी ही चांगली संधी आहे.
धारावीतील १ जानेवारी २००० किंवा त्यापूर्वी तळमजल्यावर अस्तित्वात असलेल्या व्यावसायिक आणि औद्योगिक गाळेधारकांना या अतिरिक्त क्षेत्रफळ उपलब्ध करून देण्याच्या सशुल्क योजनेत सहभागी होता येईल. मात्र त्यासाठी मुंबई महापालिकेकडून प्राप्त झालेला गुमास्ता परवाना, बेस्ट प्राधिकरणाने बसवलेले एलटी -२ वीज मीटरचे दस्तावेज गाळेधारकांनी सादर करणे आवश्यक आहे.

अपात्र गाळेधारकांनाही जागा उपलब्ध होणार
मालकी हक्काचा गाळा नसूनही भाडेकरारावर धारावीत व्यवसाय करणाऱ्या व्यावसायिकांना आणि उद्योजकांनादेखील पुनर्विकासात सामावून घेण्याच्या धोरणाला राज्य सरकारने नुकतीच मान्यता दिली आहे. या धोरणानुसार अशा (अपात्र) गाळेधारकांना पुनर्विकसित इमारतीत आरक्षित ठेवण्यात आलेली १० टक्के जागा उपलब्ध करून देण्यात येईल. या महत्त्वाच्या निर्णयामुळे धारावीतील पात्र गाळेधारकांसोबतच अपात्र व्यावसायिकांनादेखील पुनर्विकसित धारावीत व्यवसायाची संधी उपलब्ध होणार असल्याचे डीआरपीने स्पष्ट केले आहे.