मुंबईतील प्रश्नांसाठी ठाकरे दिल्लीत

सकाळ वृत्तसेवा
मुंबई, ता. ६ : शिवसेना नेते आणि युवासेनाप्रमुख आदित्य ठाकरे आज पक्षप्रमुख उद्धव ठाकरे यांच्यासह दिल्लीत दाखल झाले असून, मुंबईसह राज्यातील केंद्र सरकारच्या अखत्यारितील विविध प्रलंबित प्रश्नांवर चर्चा करण्यासाठी त्यांनी अनेक केंद्रीय मंत्र्यांची भेट ठरवली आहे.
आगामी पालिका निवडणुकीच्या पार्श्वभूमीवर आपल्या प्रश्नांच्या माध्यमातून भाजप सरकारची कोंडी करण्याचा प्रयत्न ते करीत असल्याचे बोलले जात आहे. बुधवारी संध्याकाळी आदित्य ठाकरे केंद्रीय जहाज आणि बंदर विकास मंत्री सदानंद सोनवाल यांची भेट घेणार असून, या बैठकीत मुंबई पोर्ट ट्रस्टच्या अधिपत्याखालील शिवडी पूर्व वसाहतींतील मूलभूत सुविधांचा अभाव तसेच शिवडीतील बीडीडी चाळ पुनर्विकास प्रकल्पाचे अडथळे या विषयांवर सविस्तर चर्चा होणार आहे. या बैठकीसाठी शिवडीचे खासदार आणि शिवसेना नेते अरविंद सावंत हेदेखील उपस्थित राहणार असून, त्यांनीच बीडीडी चाळ पुनर्विकासाचा मुद्दा केंद्र सरकारसमोर प्रभावीपणे मांडावा, असे नमूद केलेले पत्र आदित्य ठाकरेंना दिले आहे. शिवसेनेचा हा दौरा म्हणजे ‘मुंबईसाठी संघर्ष करणारी ताकद कोण?’ या प्रश्नाचे उत्तर देण्याचा प्रयत्न असल्याचे राजकीय विश्लेषकांचे म्हणणे आहे.