अंधेरी पूर्वेत इमारतीला आग

मुंबई, ता. ६ : अंधेरी पूर्वेतील कुर्ला-अंधेरी रोडवरील शांतीनगर परिसरात असलेल्या सुमिता कॉम्प्लेक्समध्ये आज पहाटे भीषण आग लागल्याची घटना घडली. या दुर्घटनेत कोणतीही जीवितहानी झालेली नाही.
महापालिकेच्या अग्निशमन दलाकडून प्राप्त माहितीनुसार, पहाटे ३ वाजून २० मिनिटांनी ही आग लागली. घटनास्थळी तातडीने दाखल झालेल्या अग्निशमन दलाने लेव्हल-१ची आग जाहीर केली. ही आग तळमजला अधिक एक मजल्याच्या इमारतीच्या पहिल्या मजल्यावर सुमारे ६०० ते ७०० चौरस फूट क्षेत्रफळात पसरली होती. आगीत इलेक्ट्रिक वायरिंग, विद्युत उपकरणे, सजावटीचे साहित्य, विविध प्रकारचे प्लॅस्टिक, कागदपत्रे, ऑफिस रेकॉर्ड्‌स व फर्निचर खाक झाले. अग्निशमन जवानांच्या अथक प्रयत्नांनंतर ही आग अखेर सकाळी ६ वाजून ३३ मिनिटांनी पूर्णपणे आटोक्यात आणण्यात आली. या आगीत कोणतीही दुखापत किंवा जीवितहानी झालेली नाही, अशी माहिती मुंबई महापालिकेच्या आपत्कालीन विभागाने दिली आहे. या घटनेच्या कारणाचा तपास सुरू असून, विद्युत उपकरणांतील बिघाडामुळे ही आग लागल्याचा प्राथमिक अंदाज वर्तविला जात आहे.