मरीन ड्राइव्हचे सौंदर्य अधिक खुलवण्यावर भर द्या
पालिका आयुक्तांचे निर्देश
सकाळ वृत्तसेवा
मुंबई, ता. ६ ः मरीन ड्राइव्ह परिसर नैसर्गिक अंगाने नितांत सुंदर आहे. या परिसराच्या सौंदर्यात भर घाला, असे निर्देश पालिका आयुक्त भूषण गगराणी यांनी प्रशासनाला दिले आहेत. नरिमन पॉइंटपासून स्वराज्यभूमी (गिरगाव चौपाटी)पर्यंत आणि त्यापुढील परिसराचे सौंदर्य अधिक खुलविण्यात सातत्य ठेवा, अशा सूचनाही त्यांनी दिल्या आहेत.
नरिमन पॉइंट ते स्वराज्यभूमीपर्यंत संपूर्ण मरीन ड्राइव्ह परिसराची पालिका आयुक्त भूषण गगराणी यांनी आज (ता. ६) सकाळी पायी फिरून पाहणी केली. या वेळी त्यांनी पालिका अधिकारी, पोलिस अधिकारी यांना विविध सूचना केल्या. महापालिकेच्या उपआयुक्त चंदा जाधव, पोलिस उप आयुक्त प्रशांत परदेशी, विशेष कार्य अधिकारी चंद्रशेखर चोरे आदी या वेळी उपस्थित होते.
एनसीपीए परिसरात अनावश्यक असलेले बॅरिकेड्स काढून टाकण्याबाबत गगराणी यांनी सूचना केली. या परिसराला मुंबईकरांसह देश-विदेशातील पर्यटक भेट देतात. त्यामुळे मरीन ड्राइव्ह परिसर अधिक सुटसुटीत आणि स्वच्छ ठेवण्यावर भर द्यावा. अनावश्यक असलेले सूचनाफलक काढून टाकावेत. मरीन ड्राइव्ह परिसरात पायी चालण्याची जागा, नागरिकांसाठी आसन व्यवस्थेसाठी बाकडे सुस्थितीत ठेवा. विजेच्या खांबांवर वाहिन्या लोंबकळणार नाहीत याची काळजी घ्या. या खांबांची वेळोवेळी रंगरंगोटी करा. दिव्यांग नागरिकांच्या व्हीलचेअरसाठी असलेली जागा अधिक सुटसुटीत ठेवा अशा बाबींकडेही गगराणी यांनी अधिकाऱ्यांचे लक्ष वेधले.

कोणतेही फलक लावू नका!
मरीन ड्राइव्ह परिसरातील प्रसाधनगृह व्यवस्थेचीही आयुक्त गगराणी यांनी पाहणी केली. या परिसरातील दुभाजक सतत स्वच्छ ठेवण्यावर भर देणे गरजेचे आहे. आरेचे स्टॉल आणि त्यांच्या रंगरंगोटीमध्ये साम्य ठेवायला हवे. या परिसरात निसर्गसौंदर्य न्याहाळण्यासाठी येणाऱ्या नागरिकांना अधिक सुविधा पुरवाव्यात. संपूर्ण परिसरात पालिकेच्या परवानगीशिवाय कोणीही कोणतेही फलक, पोस्टर्स लावणार नाही याची काळजी घ्यावी, अशा सूचना पालिका आयुक्त गगराणी यांनी केल्या.