‘सीडीओई’मध्ये ८,८५० विद्यार्थ्यांचे प्रवेश

मुंबई, ता. १० ः मुंबई विद्यापीठाच्या दूरस्थ व ऑनलाइन शिक्षण केंद्राच्या (सीडीओई, पूर्वीचे आयडॉल) पदवी आणि पदव्युत्तर स्तरांवरील विविध अभ्यासक्रमांच्या ऑनलाइन प्रवेश प्रक्रियेत आतापर्यंत ८,८५० विद्यार्थ्यांनी विविध शाखांच्या प्रथम वर्षासाठी प्रवेश घेतले आहेत. यात बीकॉमचे एक हजार ९२६, बीएतील एक हजार ८७८ तसेच पदव्युत्तर अभ्यासक्रमामध्ये एमकॉमसाठी एक हजार ५८१, एमए इंग्रजी ४९९, बीए अकाउंट फायनान्स ३८८ आणि एमए अर्थशास्त्रच्या पदव्युत्तरसाठी ३२२ विद्यार्थ्यांनी असे आतापर्यंत पदवी आणि पदव्युत्तर अभ्यासक्रमांना ८,८५० विद्यार्थ्यांनी प्रथम वर्षासाठी प्रवेश घेतले असल्याची माहिती विद्यापीठाकडून देण्यात आली.
सीडीओई विविध प्रवेशासाठी २० ऑगस्ट २०२५ पर्यंत ऑनलाइन अर्ज करता येणार आहेत. शिकण्याची लवचिकता, परवडणारे शिक्षण शुल्क, यूजीसी (डीईबी) आणि एआयसीटी मान्यताप्राप्त अभ्यासक्रम ही सीडीओईची बलस्थाने आहेत. दूरस्थ व ऑनलाइन शिक्षण केंद्रात पहिल्यांदाच पदवी स्तरावरील अभ्यासक्रमांची प्रवेश प्रक्रिया राष्ट्रीय शैक्षणिक धोरणानुसार राबवली जात आहे. या शैक्षणिक वर्षापासून एमए समाजशास्त्र हा अभ्यासक्रम ऑनलाइन पद्धतीने सुरू करण्यात आला असून, या अभ्यासक्रमाला उत्स्फूर्त प्रतिसाद मिळत आहे, असे सीडीओईचे संचालक प्रा. शिवाजी सरगर यांनी सांगितले. सर्व अभ्यासक्रमांची ऑनलाइन प्रवेश प्रक्रिया https://mucdoeadm.samarth.edu.in/ या संकेत स्थळावरून करता येणार आहे. प्रवेश प्रक्रियेसंबधातील सर्व तपशील आणि माहिती पुस्तिका (प्रॉस्पेक्ट्स) विद्यापीठाच्या https://mu.ac.in/distance-open-learning/ या संकेतस्थळावर उपलब्ध करून देण्यात आली आहे.