गणरायाच्या आगमनात नियोजनाचा खोळंबा
मुंबईत अनेक ठिकाणी वाहतुकीचा खोळंबा 
सकाळ वृत्तसेवा 
मुंबई, ता. १० :  अवघ्या दोन आठवड्यांवर येऊन ठेपलेल्या गणेशोत्सवाची सार्वजनिक गणेशोत्सव मंडळांनी जोरदार तयारी सुरू केली आहे. मुंबईतील काही मोठ्या मंडळांच्या बाप्पाचे रविवारी  मोठ्या थाटामाटात, वाजत-गाजत आगमन झाले; मात्र वाहतूक पोलिसांच्या नियोजनाच्या अभावामुळे अनेक ठिकाणी वाहतूक कोंडी झाली.  
राज्य सरकारने गणेशोत्सवाला राज्य उत्सवाचा दर्जा बहाल केल्याने यंदा मंडळांच्या पदाधिकारी आणि कार्यकर्त्यांमध्ये अधिकच उत्साह जाणवत आहे. त्याचे प्रतिबिंब मंडपात येणाऱ्या गणेशमूर्तींच्या आगमनावेळी जाणवले. नेहमीपेक्षा यंदा मिरवणुकीत अधिक गर्दी दिसली. गणरायाच्या आगमनावेळी वाहतूक बदलाबाबत माहिती पोलिसांकडून सोशल मीडिया आणि संकेतस्थळावर दिली जाते; मात्र यंदा त्याबाबत सूचना न दिल्याने वाहनचालकांचा गोंधळ उडाला. परळ येथे  काही काळ वाहतूक ठप्प झाली होती. 
----
रविवारी आगमन झालेले गणराय
मुंबईचा सम्राट (खेतवाडी),  मुंबईचा महाराजा (खेतवाडी),  अखिल चंदनवाडी,  परळचा महाराजा, करी रोडचा राजा,  खेतवाडीचा विघ्नहर्ता, परळचा सम्राट,  माझगावचा मोरया,  खेतवाडीचा चिंतामणी, ताडदेवचा राजा आदी गणरायांचे रविवारी आगमन झाले.