अंधेरी ते वांद्रेतील टपाल सेवेत विलंब
मुंबई , ता. १२ : अंधेरी ते वांद्रे टपाल विभागात सुरू असलेल्या सॉफ्टवेअर इंस्टॉलेशन व प्रणाली अद्यतनमुळे टपाल सेवेत विलंब होत आहे. त्रस्‍त नागरिकांच्या तक्रारी आल्यानंतर वॉचडॉग फाउंडेशनने महाराष्ट्र सर्कलचे मुख्य टपाल महानिरीक्षकांना याबाबत पत्र लिहून तक्रार दिली आहे.
संस्थेच्या म्हणण्यानुसार, गेल्या काही दिवसांत मरोल आणि विलेपार्ले टपाल कार्यालयातून निघणाऱ्या स्पीड पोस्ट, नोंदणीकृत पार्सल आणि एक्स्प्रेस पार्सलच्या वितरणात लक्षणीय विलंब होत आहे. नियमानुसार ठरवलेला वेळमर्यादा मोठ्या प्रमाणात ओलांडली जात असून, ट्रॅकिंग पोर्टलवर कोणताही स्पष्ट अपडेट उपलब्ध नाही. आधुनिकीकरणासाठी सॉफ्टवेअर अद्यतन करणे गरजेचे आहे. मात्र, या प्रक्रियेमुळे सेवेत मोठा अडथळा निर्माण झाला आहे. त्‍यामुळे टपाल विभागाच्या विश्वासार्हतेवर परिणाम होत असल्‍याचे पत्रात नमूद आहे.