मुंबईकरांना लालपरीच हवी
तीन लाख प्रवाशांनी केला प्रवास; सर्वाधिक सातारा आणि स्वारगेट मार्गाला पसंती
सकाळ वृत्तसेवा
मुंबई, ता. १३ : यंदा रक्षाबंधन आणि त्याला जोडून आलेल्या सु‌ट्ट्यांमुळे ८ ते ११ ऑगस्ट या चार दिवसांमध्ये एसटीच्या मुंबई विभागाला तीन कोटी चार लाख रुपयांचे उत्पन्न मिळाले आहे. विशेष म्हणजे ९ ऑगस्टला एका दिवशी तब्बल ८० लाख २० हजार रुपयांचे उत्पन्न प्रवासी वाहतुकीतून मिळाले आहे. यामध्ये मुंबई ते सातारा आणि मुंबई ते स्वारगेट मार्गाला पसंती मिळाली आहे.

राज्याची जीवनवाहिनी म्हणून एसटी ओळखली जाते. ग्रामीण भागातील विशेषतः गावखेड्यातील प्रवासीवर्ग प्रवासासाठी एसटीवरच अवलंबून आहे. मुंबईतून दरवर्षी रक्षाबंधन आणि भाऊबीज या दोन दिवसांमध्ये विक्रमी उत्पन्न मिळते. रक्षाबंधनाच्या आदल्या दिवशी म्हणजे शुक्रवारी (ता. ८) ६६ लाख ५२ हजार रुपये, रक्षाबंधनाच्या दिवशी म्हणजे शनिवारी (ता. ९) ८० लाख २० हजार रुपये, रविवारी (ता. १०) ७८ लाख ३ हजार व सोमवारी (ता. ११) तब्बल ७९ लाख ६३ हजार इतके विक्रमी उत्पन्न एसटीला मिळाले. रक्षाबंधन सणानिमित्त ८ ते ११ ऑगस्ट या चार दिवसांत तीन लाख ३६ हजार प्रवाशांनी एसटीमधून सुरक्षित प्रवास केला आहे. त्यामध्ये महिला प्रवाशांची संख्या तब्बल एक लाख आठ हजार आहे.

मुंबईकरांनी रक्षाबंधन सणानिमित्त लालपरीला खूप चांगला प्रतिसाद दिला. ते नेहमीच एसटीला प्राधान्य देतात. आपल्या घरी सण असूनदेखील कर्मचारी कर्तव्य बजावत आहेत. त्यांच्या मेहनतीमुळेच चांगले उत्पन्न मिळाले आहे.
- अभिजित पाटील, विभाग नियंत्रक, मुंबई