भारत गौरव टुरिस्ट ट्रेनद्वारे ‘उत्तर भारत देवभूमी यात्रा’
५,००० किमीचा १० रात्री, ११ दिवसांचा आध्यात्मिक प्रवास
सकाळ वृत्तसेवा
मुंबई, ता. १३ : भारतीय रेल्वे केटरिंग अँड टुरिझम कॉर्पोरेशनने (आयआरसीटीसी) ‘भारत गौरव टुरिस्ट ट्रेन’ योजनेअंतर्गत ‘उत्तर भारत देवभूमी यात्रा’ या विशेष प्रवासाची घोषणा केली आहे. हा ११ दिवसांचा आध्यात्मिक प्रवास ४ ते १४ ऑक्टोबर २०२५ या काळात होणार आहे, ज्यामध्ये सुमारे ५,००० किलोमीटरचा प्रवास पूर्ण केला जाईल.
या यात्रेत पर्यटकांना उत्तर भारतातील प्रमुख धार्मिक व ऐतिहासिक स्थळांना भेट देता येणार आहे. यात हरिद्वार-ऋषिकेशमधील गंगा आरती, अमृतसरमधील सुवर्ण मंदिर व वाघा बॉर्डर समारंभ, कटऱ्यातील माता वैष्णोदेवी दर्शन, मथुरा-वृंदावनमधील कृष्णजन्मभूमी व भक्ती स्थळे तसेच आग्र्यातील ताजमहाल यांचा समावेश आहे. हा प्रवास कोल्हापूर येथून सुरू होऊन कोल्हापूर येथे संपणार आहे. वाटेत मिरज, सांगली, कराड, सातारा, पुणे, लोणावळा, कल्याण अशा अनेक शहरांतून प्रवाशांना चढण्याची आणि उतरण्याची सोय उपलब्ध आहे.
अधिक माहितीसाठी www.irctctourism.com या संकेतस्थळाला भेट द्यावी किंवा ८२८७९३१८८६ या क्रमांकावर संपर्क साधण्याचे आवाहन करण्यात आले आहे.

ट्रेन आणि सुविधा
या विशेष ट्रेनमध्ये स्लीपर, ३ एसी आणि २ एसी श्रेणीतील कोच उपलब्ध आहेत. प्रवाशांसाठी राहण्यासाठी हॉटेलची सोय केली जाईल. सुरक्षिततेसाठी सीसीटीव्ही कॅमेरे, सुरक्षा रक्षक आणि स्वच्छतेची विशेष काळजी घेतली जाणार आहे.
या पॅकेजमध्ये सर्व शाकाहारी जेवण, राहण्याची सोय, स्थळांना भेट देण्यासाठी स्थानिक वाहनांची व्यवस्था, प्रवास विमा आणि अनुभवी टूर मॅनेजरची सेवा यांचा समावेश आहे.

असे असेल भाडे
इकॉनॉमी क्लास (स्लीपर) : १९,८९० रुपये
स्टँडर्ड क्लास (३एसी) : ३३,५६० रुपये
कम्फर्ट क्लास (२एसी) : ४४,४६० रुपये