शाळांमध्ये आज फाळणी स्मृतिदिनाचे आयोजन
मुंबई, ता. १३ : राज्यातील शाळांमध्ये घरोघरी तिरंगा आणि विविध सांस्कृतिक कार्यक्रमांसोबतच आता शालेय शिक्षण विभागाने पहिल्यांदाच १४ ऑगस्ट रोजी ‘फाळणी स्मृतिदिन’ (भारत पाकिस्तान फाळणीच्या दुःखद घटना) साजरा करण्याचे आदेश आज जारी केले आहेत. शालेय शिक्षण विभागाकडून आत्तापर्यंत हा दिवस कधीही साजरा केला जात नव्हता; मात्र पहिल्यांदाच हा आदेश जारी केल्याने आश्चर्य व्यक्त केले जात आहे.
१९४७ मध्ये भारताच्या फाळणीदरम्यान झालेल्या मानवी हक्कांच्या उल्लंघनाची आठवण ठेवून विद्यार्थ्यांमध्ये ऐक्य, सौहार्द आणि शांततेचे मूल्य रुजविण्यासाठी हा उपक्रम राबविला जाणार आहे. या दिवशी राज्यातील सर्व शाळांमध्ये विशेष कार्यक्रम आयोजित करण्याचे आणि विद्यार्थ्यांना ऐतिहासिक पार्श्वभूमीची माहिती देण्याचे कार्यक्रम सादर करावेत, यासाठीची माहिती द्यावी, असे आदेश शिक्षण संचालक महेश पालकर यांनी दिले आहेत.