डबेवाल्यांना ५०० चौरस फुटांचे घर

मुख्यमंत्री देवेंद्र फडणवीस यांची घोषणा

सकाळ वृत्तसेवा
मुंबई, ता. १४ : स्वातंत्र्यदिनाच्या पूर्वसंध्येला डबेवाल्या बांधवांसाठी ५०० चौरस फुटांचे घर अवघ्या २५ लाख ५० हजार रुपयांत देण्याची घोषणा आज मुख्यमंत्री देवेंद्र फडणवीस यांनी केली. प्रधानमंत्री आवास योजना आणि इतर शासकीय योजनांच्या माध्यमातून परवडणारा गृहनिर्माण प्रकल्प पूर्ण करण्यात येणार असल्याचे त्यांनी सांगितले.
वांद्रे पश्चिम येथे उभारण्यात आलेल्या ‘डबेवाला आंतरराष्ट्रीय अनुभव केंद्रा’चे उद्‌घाटन मुख्यमंत्री देवेंद्र फडणवीस यांच्या हस्ते झाले. त्या वेळी त्यांनी डबेवाल्यांना कमी किमतीत घरे उपलब्ध होणार असल्याची घोषणा केली. डबेवाल्यांच्या गृहनिर्माण प्रकल्पासाठी जमीन उपलब्ध करून देणारे त्रिपाठी यांचे तसेच नफा न घेता उत्कृष्ट दर्जाचे बांधकाम करण्याची जबाबदारी स्वीकारणारे जयेश शाह आणि संपूर्ण टीमचे मुख्यमंत्र्यांनी विशेष कौतुक केले. सर्व प्रक्रिया पारदर्शकपणे पूर्ण करून आज या करारावर स्वाक्षऱ्या करण्यात आल्याची माहिती त्यांनी या वेळी दिली. सांस्कृतिक कार्य मंत्री, मुंबई उपनगर जिल्ह्याचे पालकमंत्री ॲड. आशीष शेलार, आमदार श्रीकांत भारतीय, योगेश सागर, तमिळ सेल्वन यांच्यासह नूतन मुंबई टिफीन बॉक्स सप्लायर चॅरिटी ट्रस्टचे अध्यक्ष उल्हास मुके, मुंबई टिफीन बॉक्स सप्लायर असोसिएशनचे अध्यक्ष रामदास करवंदे, सचिव किरण गवांदे आदी उपस्थित होते.