दादरच्या आयडियल गल्लीत दहीहंडीचा उत्साह

सकाळ वृत्तसेवा
मुंबई, ता. १६ ः ‘आयडियल सेलिब्रिटी व पर्यावरणपूरक दहीहंडी उत्सव २०२५’ दहीहंडीचा उत्साह शनिवारी (ता. १६) जल्लोषात साजरा करण्यात आला. महाराष्ट्र प्रदूषण नियंत्रण मंडळ व आयडियल बुक कंपनी (दादर) यांच्या संयुक्त विद्यमाने तसेच श्री साई दत्त मित्र मंडळ आणि बाबूशेठ पवार व मित्र मंडळ यांच्या सहकार्याने आयोजित या उत्सवात अनेक महिला व पुरुष दहीहंडी पथकांनी हजेरी लावली.

तेजस्विनी महिला दहीहंडी आणि पुरुष पथक (सुभाषनगर, धारावी) पथकांनी सलामी देत आणि दहीहंडी फोडून हा पारंपरिक व सांस्कृतिक सण उत्साहात साजरा करण्यात आला. दरवर्षीप्रमाणे यंदाही आयडियल गल्लीतील दहीहंडी पाहण्यासाठी नागरिकांची प्रचंड गर्दी झाली होती. उत्सवाच्या विशेष उपक्रमांतर्गत पर्यावरणपूरक संदेश देणारे पथनाट्य सादर करण्यात आले. तसेच ठाकूर कॉलेजमधील विद्यार्थ्यांनी सायबर सिक्युरिटी या महत्त्वाच्या विषयावर प्रभावी पथनाट्य सादर करून जनजागृती केली. या वेळी मालाड येथील शिवसागर दहीहंडी पथकाने चौथ्या थरावर छत्रपती संभाजी महाराजांच्या शौर्याचा इतिहास उभा करणारे मनोहारी सादरीकरण केले. अंध व दिव्यांग गोविंदा पथकाने तब्बल पाच थर रचून सलामी दिली. याशिवाय आयडियल गल्लीतली खास ओळख असलेली ‘सेलिब्रिटी दहीहंडी’ यंदाही रंगतदार ठरली. दशावतार चित्रपटातील अभिनेते अभिनय बेर्डे, सिद्धार्थ मेनन आणि अभिनेत्री प्रियदर्शिनी इंदलकर यांनी उपस्थित राहून उत्सवाला शोभा आणली. विशेष म्हणजे, यंदा सेलिब्रिटी दहीहंडी फोडण्याचा मान अभिनेते सिद्धार्थ मेनन यांना मिळाला.