बेस्ट कामगारांच्या घरांसाठी लाड समिती
प्रवीण दरेकर यांची सूचना; बेस्ट कर्मचारी वसाहतीची पाहणी

मुंबई, ता. १७ : ‘स्वयंपुनर्विकासासाठी दरेकर समितीच्या धर्तीवर बेस्ट कामगारांच्या घरांसाठी लाड समितीची स्थापना करायला हवी, जेणेकरून बेस्ट कामगारांच्या घरांचा प्रश्न मार्गी लागेल, अशी सूचना विधान परिषदेतील भाजप गटनेते आणि मुंबई बँकेचे अध्यक्ष प्रवीण दरेकर यांनी रविवारी (ता. १७) केली.

प्रवीण दरेकर आणि प्रसाद लाड यांनी आज परळ येथील बेस्ट कर्मचारी वसाहतीची पाहणी केली. गिरणी कामगारांना गिरण्यांच्या जागेवर घरे मिळतात. तसेच बेस्ट वसाहतीत राहणाऱ्या बेस्ट कामगारांनाही घरे मिळावीत, असेही दरेकर म्हणाले. दी बेस्ट एम्प्लॉईज को-ऑपरेटिव्ह क्रेडिट सोसायटी लिमिटेड श्रमिक उत्कर्ष सभा प्रणित सहकार समृद्धी पॅनेलच्या उमेदवारांच्या प्रचारादरम्यान ते बोलत होते. सहकार समृद्धी पॅनेलच्या उमेदवारांच्या ‘कपबशी’च्या पाठीशी बेस्ट कामगारांनी उभे राहावे, असे आवाहनही त्यांनी केले. ते म्हणाले ‘यापूर्वी सत्ताधारी असलेल्या बेस्ट कामगार सेनेने २५ वर्षे कामगारांसाठी काहीही केले नाही. केवळ कामगारांच्या कष्टाचा पैसा लुटण्याचे काम शिवसेनेने केले. उलट आम्ही कामगारांना काही द्यायला आलो आहोत. प्रसाद लाड यांच्या पुढाकाराने कामगारांना ५२ कोटींचा कोविड भत्ता देण्यात आला आहे.’ आम्ही सत्तेवर आल्यास कामगारांना आरोग्य विमा तसेच दुर्दैवाने कामावर असताना कामगाराचा मृत्यू झाल्यास १० लाखांची भरपाई, निवृत्तीच्या योजना तसेच घरासाठी अत्यल्प व्याजदरात पतपेढी आणि जिल्हा बँकेतर्फे एकत्रित निधी देऊ, असे दरेकर यांनी आश्‍वासन दिले. दरम्यान, पतपेढीतील भ्रष्टाचारप्रकरणी आर्थिक गुन्हे शाखेमार्फत चौकशी लावण्यात आली असून, भ्रष्टाचार करणाऱ्यांना तुरुंगात जावे लागेल, असा इशाराही त्यांनी दिला.

क्षणभर नाही तर कायमची विश्रांती!
इतकी वर्षे बेस्ट कामगारांना लुटणाऱ्यांनी बंगले बांधले, क्षणभर विश्रांती केली; मात्र बेस्ट कामगार आता यांना क्षणभर नव्हे तर कायमची विश्रांती देतील, अशा शब्दांत दरेकर यांनी टीका केली. नागे यांच्या युनियनने त्यांच्या बॅनरवर माझा फोटो लावला आहे; मात्र ही फसवेगिरी असून, त्यांच्यावर गुन्हा दाखल करायला हवा, असा इशाराही दरेकर यांनी दिला.