‘शालार्थ’साठी मुदतवाढ द्या!
माहिती भरण्यास शिक्षक संघटनांची मागणी
सकाळ वृत्तसेवा
मुंबई, ता. १९ ः शालार्थ आयडी आणि वैयक्तिक मान्यतेप्रकरणी विविध जिल्ह्यातील घोटाळ्यांतील शिक्षकांची ओळख आणि माहिती करून घेण्यासाठी शिक्षण विभागाने शनिवार (ता. ३०)पर्यंत मुदत दिली आहे. अद्याप असंख्य शिक्षकांनी ही माहिती न भरल्याने त्यांच्यावर फौजदारी गुन्हे दाखल केले जाणार आहे. यामुळे शिक्षकांमध्ये भीतीचे वातावरण निर्माण झाले असून ही माहिती भरण्यास सहा महिन्यांची मुदतवाढ द्यावी, अशी मागणी महाराष्ट्र राज्य कनिष्ठ महाविद्यालयीन शिक्षक महासंघाने शालेय शिक्षणमंत्र्यांकडे केली आहे.
राज्यात शालार्थ आयडी आणि वैयक्तिक मान्यतेबाबत चौकशी सुरू असून, यात अधिकाऱ्यांपेक्षाही संस्थाचालक आणि संघटनांच्या प्रतिनिधींवर अधिक संशय व्यक्त केला जात आहे. सर्वाधिक गैरप्रकार संस्थाचालकांनी केले असून त्याचीही चौकशी केली जात आहे. वैयक्तिक मान्यतांमध्ये कुटुंबातील लोकांना शिक्षक, मुख्याध्यापक पदे देताना आरक्षणाचे नियम धाब्यावर बसवले आहे. याप्रकरणी आतापर्यंत एकाही संस्थाचालकांवर कारवाई झाली नसल्याने आश्चर्य व्यक्त केले जात आहे. याच पार्श्वभूमीवर आता महाराष्ट्र राज्य कनिष्ठ महाविद्यालयीन शिक्षक महासंघाने शिक्षकांची माहिती अपलोड करण्यासाठी मुदतवाढ देण्याची मागणी केली आहे.
---
घोटाळेबाज शिक्षणसंस्था ताब्यात घ्या!
राज्यात शालार्थ आयडी आणि वैयक्तिक मान्यतेबाबत गैरप्रकार, घोटाळे केलेल्या शिक्षण संस्था सरकारने ताब्यात घ्याव्यात, अशी मागणी महाराष्ट्र राज्य शिक्षक परिषदेचे कार्यवाह व माजी शिक्षक आमदार नागो गाणार यांनी केली आहे. महसूलमंत्री चंद्रशेखर बावनकुळे यांनी नुकतेच शालार्थ आयडी घोटाळ्यातील शाळा संचालकांची मालमत्ता जप्त करण्याची घोषणा केली होती. त्याचे परिषदेने स्वागत केले आहे. यासंदर्भात त्यांनी मुख्यमंत्री देवेंद्र फडणवीस, शालेय‍ शिक्षणमंत्री दादा भुसे यांना पत्र पाठवले आहे.
----