मोनोरेलमध्‍ये तांत्रिक बिघाड
चेंबूर-भक्ती पार्कदरम्यान प्रवासी अडकले
सकाळ वृत्तसेवा
मुंबई, ता. १९ : धुवाधार पावसामुळे रस्ते आणि लोकल वाहतूक पुरती कोलमडलेली असतानाच सायंकाळी मुंबईकरांनी घरी पोहोचण्यासाठी मोनोरेल, मेट्रोचा आधार घेतला. पण सायंकाळी सव्वासहाच्या सुमारास चेंबूर ते भक्ती पार्कदरम्यान तांत्रिक बिघाडामुळे मेनोरेल अचानक बंद पडल्याने प्रवाशांची मोठी लटकंती झाली. दरम्यान, अग्निशमन दलाच्या जवानांनी धाव घेत अडकलेल्या प्रवाशांना सुखरूप खाली उतरवले.
पावसामुळे चुनाभट्टी, कुर्ला, शीव परिसरात रेल्वे ट्रॅकवर पाणी असल्याने लोकल सेवा बंद होती. मात्र चेंबूरच्या पुढे लोकल सुरू असल्याने दिवसभर कार्यालयात अडकून पडलेल्या अनेकांनी मोनोरेलने चेंबूरपर्यंत जाणे पसंत केले. सायंकाळी ६.१५ वाजताच्या दरम्यान चेंबूर ते भक्ती पार्कदरम्यान मोनोरेल बंद पडली. प्रवाशांनी आपत्कालीन परिस्थितीत तात्काळ मदतीसाठी महापालिकेच्या १९१६ या क्रमांकावर संपर्क साधला. त्याची तातडीने दखल घेत मुंबई अग्निशमन दलाने घटनास्थळी धाव घेत प्रवाशांना खाली उतरवले. तांत्रिक बिघाडामुळे सुमारे पाऊण तास मोनोरेलची सेवा ठप्प होती. त्यानंतर दुसऱ्या मोनोरेलच्या मदतीने टोइंग करीत ही गाडी बाजूला केल्यानंतर सेवा पूर्ववत झाली.