लहानशा रस्त्यासाठी तब्बल सात कोटींचा खर्च
सकाळ वृत्तसेवा
मुंबई, ता. २१ : पूर्व उपनगरातील घाटकोपर (प्रभाग क्र.१२७) मधील कातोडीपाडा ते रामनगर या रस्त्याच्या लादीकरणासाठी महापालिकेने तब्बल सात कोटी २४ लाख रुपयांचा अंदाज मांडला आहे. झोपड्या हटवल्यानंतर मोकळ्या झालेल्या जागेवर लादी टाकण्याचे हे काम असून, इतक्या मोठ्या खर्चावर नागरिकांनी प्रश्नचिन्ह उपस्थित केले आहे.

महापालिकेने या कामासाठी निविदा प्रक्रिया राबवून साई सिद्धी इन्फ्रास्ट्रक्चर या कंपनीला ठेका दिला आहे. कार्यालयीन अंदाजाच्या तुलनेत कंपनीने फक्त १.१५ टक्के कमी दराने काम करण्यास संमती दर्शविली आहे. त्यामुळे खर्चात कोणतीही लक्षणीय बचत झाली नसल्याचे स्पष्ट होते. बैठकीत चर्चेनंतर डोंगराळ भाग, डक्ट लाइन आणि झोपडपट्टी हटविलेल्या जागेवर रस्ता बांधकामाची परवानगी मिळाल्याचे सांगण्यात आले. तसेच पुन्हा अतिक्रमण होऊ नये, यासाठी हा रस्ता तातडीने करणे आवश्यक असल्याचे महापालिकेचे म्हणणे आहे; मात्र केवळ एक किमीपेक्षा कमी अंतरासाठी एवढा प्रचंड खर्च होणे नागरिकांना खटकत आहे.

शहरातील इतर अनेक विकासकामे निधीअभावी रखडलेली असताना या लहानशा रस्त्याला कोट्यवधी रुपयांचा खर्च मंजूर केल्याने “ठेकेदारांची लॉटरी लागली” अशी चर्चा सुरू आहे. गुणवत्ता तपासणीसाठी सल्लागार नेमण्याची घोषणा केली असली, तरी प्रत्यक्षात हा खर्च योग्य आहे का, असा सवाल नागरिक करत आहेत.