रोषणाईपासून बससेवेपर्यंत
-गणेशोत्सवासाठी बेस्टची फुल तयारी

मुंबई, २१ : ‘गणपती बाप्पा मोरया’च्या जयघोषात अवघ्या मुंबईकरांचे मन रंगून जाणाऱ्या सार्वजनिक गणेशोत्सवासाठी बेस्ट उपक्रमाने यंदा खास तयारी केली आहे. दिवसरात्र गणेशभक्तांना सुरळीत सेवा मिळावी, विसर्जनावेळी कुठेही अंधार किंवा गैरसोय होऊ नये यासाठी वीज व वाहतूक विभागाने भक्कम नियोजन आखले आहे.
महानगरपालिकेच्या आदेशानुसार वीज विभागाने ७१ मिरवणूक मार्ग, १९ विसर्जन स्थळे आणि ३९ कृत्रिम तलावांवर तब्बल २७२३ दिवे बसवले आहेत. गर्दीच्या ठिकाणी १५ स्थायी विद्युत मनोरे उभारण्यात आले आहेत. आपत्कालीन प्रसंगी प्रकाश व वीजपुरवठा अखंड रहावा म्हणून आठ डिझेल जनित्रांची सोय केली आहे. समुद्रातील विसर्जनावेळी जीव वाचविणाऱ्या बचाव पथकाला मदत व्हावी म्हणून १९ शक्तिशाली शोधप्रकाश (सर्चलाइट)देखील लावण्यात आले आहेत.
भक्तांचा ओघ लक्षात घेऊन दिवसासह रात्रीदेखील विशेष बससेवेची व्यवस्था करण्यात आली आहे. या सर्व उपक्रमांची माहिती असलेली पुस्तिका २० ऑगस्ट रोजी प्रकाशित करण्यात आली आहे. ती पुस्तिका गणेश मंडळे आणि मुंबईकरांच्या सोईसाठी बेस्टच्या संकेतस्थळावर उपलब्ध करून दिली आहे.

......
बेस्टच्या विशेष योजना :
-७१ मिरवणूक मार्ग, १९ विसर्जन स्थळे, ३९ कृत्रिम तलावांवर २७२३ दिवे बसवले जाणार.
-गर्दीच्या ठिकाणी १५ स्थायी विद्युत मनोरे उभारले.
-अखंडित वीजपुरवठ्यासाठी आठ डिझेल जनित्रांची व्यवस्था.
-समुद्रातील विसर्जनावेळी बचाव पथकासाठी १९ उच्च क्षमतेचे शोधप्रकाश (सर्चलाइट) व्यवस्था.
-विसर्जन स्थळांवर अधिकारी व कर्मचाऱ्यांची नेमणूक करून सुरळीत सेवा.
-गणेशभक्तांसाठी विशेष बससेवेची सोय.
..........