भेटीत राजकीय नव्‍हे, तर
वाहतूक कोंडीवर चर्चा!

मुख्यमंत्र्यांच्या भेटीवर राज ठाकरे यांचे भाष्य; ‘मैदानाखालील पार्किंग’चा मांडला आराखडा

सकाळ वृत्तसेवा
मुंबई, ता. २१ : महाराष्ट्र नवनिर्माण सेनेचे अध्यक्ष राज ठाकरे यांनी गुरुवारी (ता. २१) मुख्यमंत्री देवेंद्र फडणवीस यांची मलबार हिलवरील ‘वर्षा’ निवासस्थानी भेट घेतली. या भेटीदरम्यान मुंबई पोलिस आयुक्त आणि वाहतूक विभागातील वरिष्ठ अधिकारी उपस्थित होते. ही भेट राजकीय नसून वाहतूक कोंडीसह मुंबईतील विविध समस्यांबाबत या वेळी चर्चा केल्याचे राज ठाकरे यांनी स्पष्‍ट केले.

भेटीनंतर राज ठाकरे यांनी दादरच्या ‘शिवतीर्थ’ येथे पत्रकार परिषद घेतली. ही भेट राजकीय नव्हती. या भेटीत मुख्यतः मुंबईतील वाढती वाहतूक कोंडी, वाढत्या वाहनांची संख्या आणि पार्किंगच्या समस्येवर चर्चा करण्यात आल्याचे त्यांनी स्पष्‍ट केले.
ठाकरे म्हणाले, की राज्यातील अनेक शहरांत विकास आणि पुनर्विकासाची कामे सुरू आहेत; मात्र त्यात बेकायदा बांधकामे होत आहेत. मूलभूत समस्यांकडे दुर्लक्ष होत आहे. विशेषतः पार्किंगसाठी ठोस योजना करण्याची गरज आहे.
पार्किंगसाठी मुख्यमंत्र्यांना आराखडा सादर केला आहे. या आराखड्यानुसार खेळाच्या मैदानाखाली पार्किंगची व्यवस्था करता येईल. त्यामुळे मुलांचे मैदानही टिकून राहील आणि पार्किंग सुविधाही मिळेल, असे ठाकरे म्हणाले.
-----
कायद्याला न जुमानण्याची वृत्ती धाेकादायक!
वाहतुकीच्या बाबतीत कठोर कारवाई आवश्यक आहे. ‘दारू पिऊन वाहन चालवण्याचे प्रमाण मोठ्या दंडामुळे कमी झाले आहे. अशाच प्रकारे वाहतूक नियम मोडणाऱ्यांवर कडक दंड लावला, तर शिस्त निर्माण होईल, असे ठाकरे या वेळी म्हणाले. कायद्याला न जुमानण्याची वृत्ती वाढली तर शहरातील समस्या आणखी गुंतागुंतीच्या होतील. त्यामुळे वेळेत उपाययोजना करणे आवश्यक आहे, असेही ते म्हणाले.
.......
श्वानप्रेम...
पत्रकार परिषद सुरू असतानाच ठाकरे यांचा ‘रायनो’ हा पिटबुल श्वान अचानक आत आला. ठाकरे यांनी हसत त्याला जवळ बोलावले, कौतुक केले आणि ‘ये पिल्लू’ अशी हाक मारली. त्याचे नाव विचारताच त्यांनी सांगितले, ‘याचे नाव रायनो आहे.’ या क्षणाने गंभीर चर्चेचे वातावरण काही वेळ हलके झाले. प्राणिप्रेमी म्हणून ओळखले जाणारे राज ठाकरे शिवाजी पार्कमध्ये आपल्या पाळीव कुत्र्यांसोबत फिरताना किंवा प्रवासादरम्यान भटक्या कुत्र्यांशीही आपुलकी दाखवताना अनेकदा दिसतात.