एसटी कर्मचाऱ्यांचा पगार गणेशोत्सवापूर्वी : प्रताप सरनाईक

सकाळ वृत्तसेवा
मुंबई, ता. २५ : राज्य शासनाच्या इतर कर्मचाऱ्यांप्रमाणे एसटीच्या सुमारे ८३ हजार कर्मचारी व अधिकाऱ्यांचे ऑगस्ट महिन्याचे वेतन गणेशोत्सवापूर्वी देणार असल्याची माहिती परिवहनमंत्री तथा एसटी महामंडळाचे अध्यक्ष प्रताप सरनाईक यांनी सोमवारी (ता. २५) दिली.

मंत्री सरनाईक म्हणाले की, ‘एसटीच्या कर्मचाऱ्यांचा पगार हा महिन्याच्या ७ ते १० तारखेच्या दरम्यान होतो; परंतु यंदा गणपती उत्सव हा ऑगस्टच्या शेवटी आल्याने केवळ वेतनामुळे कर्मचाऱ्यांच्या उत्सवाच्या आनंदावर विरजण पडू नये, म्हणून राज्य सरकारला एसटीच्या विविध सवलती पोटीची प्रतिपूर्ती रक्कम लवकर देण्याची विनंती करण्यात आली आहे. त्यानुसार २५ ऑगस्ट रोजी यासंदर्भातील शासन निर्णय निर्गमित करण्यात आला असून, लवकरच एसटीच्या सर्व कर्मचारी व अधिकाऱ्यांच्या बॅंक खात्यांवर त्यांचे ऑगस्ट महिन्याचे वेतन जमा होईल. आपले सण-उत्सव साजरे न करता सर्वसामान्य प्रवासी जनतेसाठी अहोरात्र राबणाऱ्या एसटी कर्मचाऱ्यांना यंदाचा गणेशोत्सव अतिशय उत्साहात आणि आनंदात साजरा करता यावा, हीच अपेक्षा आहे.’