कोकण रेल्वेवर एलटीटी ते सावंतवाडी विशेष गाड्या
मुंबई, ता. २५ : गणेशोत्सवाच्या काळात कोकणात जाणाऱ्या प्रवाशांची गर्दी लक्षात घेऊन कोकण रेल्वेने लोकमान्य टिळक टर्मिनस (एलटीटी) ते सावंतवाडी रोड या मार्गावर दोन विशेष गाड्या चालवण्याचा निर्णय घेतला आहे. या अतिरिक्त गाड्यांमुळे प्रवाशांना दिलासा मिळणार आहे. ट्रेन क्रमांक ०११०९ एलटीटी ते सावंतवाडी रोड विशेष २६ आणि २७ ऑगस्ट रोजी पहाटे एक वाजता सुटेल. ट्रेन क्रमांक ०१११० सावंतवाडी रोड ते एलटीटी विशेष २६ आणि २७ ऑगस्ट रोजी सायंकाळी पावणेपाच वाजता सावंतवाडी रोडवरून सुटेल. या गाड्यांना ठाणे, पनवेल, पेण, रोहा, खेर्डी, चिपळूण, संगमेश्वर रोड, रत्नागिरी, राजापूर रोड, वैभववाडी रोड, कणकवली, सिंधुदुर्ग आणि कुडाळ या स्थानकांवर थांबे देण्यात आले आहेत. या विशेष गाड्यांमध्ये एकूण २२ एलएचबी कोच असून, त्यामध्ये १ प्रथम श्रेणी, १ द्वितीय श्रेणी, ५ तृतीय श्रेणी, ८ शयनयान, ४ सामान्य डब्यांचा समावेश असेल.