गणेशोत्सवाच्या सुट्टीत खुले राहणार जिजामाता उद्यान
मुंबई, ता. २५ : भायखळा (पूर्व) येथील वीरमाता जिजाबाई भोसले वनस्पती उद्यान आणि प्राणिसंग्रहालय गणेश चतुर्थीच्या निमित्ताने बुधवारी (ता. २७) जनतेसाठी खुले राहणार आहे; मात्र त्याच्या दुसऱ्या दिवशी म्हणजे गुरुवारी हे उद्यान व प्राणिसंग्रहालय बंद असेल, अशी माहिती महापालिकेकडून देण्यात आली आहे. सामान्यपणे हे उद्यान दर बुधवारी साप्ताहिक सुट्टीमुळे बंद ठेवले जाते. पण पालिकेच्या ठरावानुसार जर सार्वजनिक सुट्टी बुधवारी आली तर त्या दिवशी उद्यान व प्राणिसंग्रहालय खुले ठेवले जाते आणि त्याच्या पुढील दिवशी बंद ठेवण्यात येते. त्यामुळे मुंबईकर आणि पर्यटकांना २७ ऑगस्ट रोजी गणेशोत्सवाच्या सुट्टीत प्राणिसंग्रहालय व उद्यान पाहण्याची संधी मिळणार आहे.