राज्यातील तीन शिक्षकांना राष्ट्रीय शिक्षक पुरस्कार जाहीर

मुंबई, ता. २५ : केंद्र सरकारकडून जाहीर केल्या जाणाऱ्या राष्ट्रीय शिक्षक पुरस्काराची घोषणा करण्यात आली असून, यात देशातील ४५ शिक्षकांना हा पुरस्कार जाहीर करण्यात आला आहे. यामध्ये मुंबईतील सोनिया कपूर, लातूर जिल्ह्यातील डॉ. संदीपान जगदाळे आणि नांदेड जिल्ह्यातील डॉ. शेख मोहम्मद वखिओदिन यांची राष्ट्रीय शिक्षक पुरस्कार २०२५ साठी निवड झाली आहे.

राष्ट्रीय शिक्षक पुरस्काराचे स्वरूप गुणवत्तेचे प्रमाणपत्र, ५० हजार रुपये रोख आणि रौप्यपदक असे असून, याचे वितरण ५ सप्टेंबर २०२५ रोजी विज्ञान भवन, नवी दिल्ली येथे होणार असल्याची माहिती केंद्रीय शिक्षण विभागाच्या शिक्षण आणि साक्षरता विभागाचे संचालक भगवती प्रसाद कलाल यांनी दिली. मुंबईतील ॲटोमिक एनर्जी स्कूल-२ मध्ये सोनिया कपूर शिक्षिका आहेत, तर लातूर जिल्ह्यातील दयानंद कॉलेज ऑफ आर्टस येथील शिक्षक डॉ. संदीपान जगदाळे हे तर नांदेड जिल्ह्यातील अर्धापूर येथील जिल्हा परिषदेच्या शाळेत डॉ. शेख मोहम्मद वखिओदिन हे शिक्षक आहेत. राष्ट्रीय शिक्षक पुरस्कारात बिहारमधील-३, तमिळनाडू-२, मध्य प्रदेश-२, गुजरातमधील -२, उत्तर प्रदेश-२ तसेच दिल्ली, राजस्थान, मनिपूर, सिक्कीम, त्रिपुरा, आसाम, लक्षद्वीप, केरळ, कर्नाटक, गोवा आदी राज्यातील प्रत्येकी एका शिक्षकांचा समावेश आहे.