पोलिसांच्या प्रसंगावधानाने बाळ-बाळंतिणीस जीवदान

मुंबई, ता. २६ ः रेल्वेस्थानकावर तैनात पोलिस हवालदार समाधान जाधव आणि होमगार्ड फिरदौस खान यांच्या प्रसंगावधानाने अचानक प्रसूतिकळा सुरू झालेली महिला आणि तिच्या होणाऱ्या बाळाचे प्राण वाचविले. सोमवारी (ता. २५) रात्री हा प्रसंग घाटकोपर स्थानकात घडला.
कुर्ला रेल्वे पोलिस ठाण्याचे वरिष्ठ पोलिस निरीक्षक संभाजी यादव यांनी दिलेल्या माहितीनुसार, सोमवारी फातिमा फैजुल्ला शेख नायर रुग्णालयात प्रसूतीसाठी निघाल्या होत्या. घाटकोपर स्थानक येताच त्यांना अचानक प्रसूतिकळा सुरू झाल्या. त्या परिस्थितीत नायर रुग्णालय गाठणे त्यांच्यासाठी अशक्य होते. त्यांची ही परिस्थिती पाहून हवालदार जाधव आणि होमगार्ड शेख यांनी प्रसंगावधान दाखवत फातिमा यांना घाटकोपर स्थानकात उतरवून घेतले. त्यांना लगोलग घाटकोपर येथील राजावाडी रुग्णालयात दाखल केले. दाखल होताच फातिमा प्रसूत झाल्या आणि त्यांनी गोंडस मुलाला जन्म दिला. फातिमा टिटवाळा येथे राहतात. पत्नीवर बेतलेला प्रसंग आणि पोलिसांनी केलेल्या मदतीबाबत समजताच फातिमा यांचे पती आणि कुटुंबीयांनी पोलिसांचे आभार मानले. फातिमा आणि त्यांचे बाळ ठणठणीत आहेत.