घरगुती चलचित्रातून सांगणार मराठी भाषेचे महत्त्व
अभिषेक चिटणीस यांच्या घरच्या गणेशाची सजावट
सकाळ वृत्तसेवा
मुंबई, ता. ३० : भारताला स्वातंत्र्य मिळून ७८ वर्षे झाली असून १९५६ साली संयुक्त महाराष्ट्राचा लढा उभारला गेला. या लढ्यात १०५ हुतात्म्यांनी बलिदान दिले; पण आजही कर्नाटक आणि गुजरातने बळकावलेले प्रांत महाराष्ट्राला परत मिळालेले नाहीत. मराठी माणसाच्या अस्तित्वाच्या लढ्यात आता भाषेचीही लढाई समोर उभी ठाकली आहे.
महाराष्ट्रात राहूनही मराठी भाषा दुय्यम ठरतेय, अशा वेदनेवर आधारित वास्तवदर्शी चलचित्र ‘माझ्या मराठीची गोडी’तून सादर करण्यात आले आहे. या चलचित्रातून मराठी भाषा जपण्याची गरज अधोरेखित केली आहे. मराठी मातीत जन्मलो तर मराठी म्हणूनच जगायचं आणि मराठीचं गतवैभव पुन्हा उभं करायचं, हा संदेश या सादरीकरणातून दिला जातो.
लेखन आणि निवेदन उमेश सावंत यांनी केले आहे. सजावट रवींद्र शंकर चिटणीस आणि अभिषेक रवींद्र चिटणीस यांनी केली. प्रकाश योजना कौस्तुभ प्रदीप कदम आणि अभिषेक रवींद्र चिटणीस यांनी सांभाळली तर संगीत महेश मांजरेकर यांनी दिले.