दीड दिवसाच्या गणरायाचे भक्तिभावात विसर्जन
महापालिकेच्या कृत्रिम तलावांना उत्स्फूर्त प्रतिसाद

सकाळ वृत्तसेवा
मुंबई, ता. २८ : श्री गणेशोत्सवाच्या दीड दिवसाच्या गणरायाचे आज भक्तिभावाने विसर्जन करण्यात आले. शहरभरात उत्साहपूर्ण वातावरणात पार पडलेल्या या विसर्जनात अनेक गणेशभक्तांनी पर्यावरणपूरक पद्धतीने सहभाग नोंदवला. कृत्रिम तलावांमध्ये मोठ्या संख्येने विसर्जन झाल्याने महापालिकेच्या उपक्रमाला चांगला प्रतिसाद मिळाल्याचे चित्रही दिसले.
महापालिकेच्या क्षेत्रात गुरुवारी संध्याकाळी ६ वाजेपर्यंत एकूण ५,४१३ मूर्तींचे विसर्जन झाले. यामध्ये सार्वजनिक मंडळांच्या १०८, घरगुती ५,२९७, तर हरितालिकेच्या आठ मूर्तींचा समावेश आहे. महत्त्वाचे म्हणजे यातील ७० टक्के मूर्तींची विसर्जन कृत्रिम तलावात करण्यात आले. उच्च न्यायालयाच्या निर्देशानुसार सहा फुटांखालील प्लास्टर ऑफ पॅरिस मूर्तींचे विसर्जन नैसर्गिक जलाशयाऐवजी कृत्रिम तलावांमध्ये करणे आवश्यक आहे. त्यासाठी महापालिकेने शहरात एकूण २८८ कृत्रिम तलावांची उभारणी केली आहे. विसर्जनासाठी आलेल्या भाविकांनी या तलावांचा मोठ्या प्रमाणात वापर केला. दीड दिवसाच्या विसर्जनात कुठलीही अप्रिय घटना घडली नसल्याची माहिती पोलिसांनी दिली. भाविकांच्या उत्स्फूर्त सहभागामुळे गणरायाचा निरोप सोहळा भक्तिमय वातावरणात आणि शांततेत पार पडला. पाच दिवसांच्या गणरायाचे विसर्जन मोठ्या प्रमाणावर होत असल्याने त्यासाठी महापालिकेकडून व पोलिस प्रशासनाकडून विशेष व्यवस्था सुरू करण्यात आल्याचे सांगण्यात आले.