शिवसेना ठाकरे गटाच्या वतीने आंदोलकांसाठी भटारखाना सुरू

मुंबई, ता. ३१ : मराठा आरक्षणासाठी आझाद मैदानावरील आंदोलकांसाठी शिवसेना ठाकरे गटाच्या वतीने भटारखाना सुरू करण्यात आला आहे. मुंबई मराठी पत्रकार संघाच्या परिसरात शिवसेना नेत्यांकडून आठ ते १० दिवसांचे साहित्य आणले आहे. याद्वारे आवश्यकतेनुसार आंदोलकांना जेवण बनवून दिले जाणार आहे. आंदोलकांच्या गाड्या अडवल्याने त्यांची मोठी गैरसोय झाली; मात्र विविध संस्थांनी पाणी, जेवण, नाश्‍ता देण्यास सुरुवात केली आहे. यामध्ये खासदार अरविंद सावंत, अनिल देसाई, आमदार कैलास पाटील, अंबादास दानवे, माजी आमदार विनोद घोसाळकर, माजी मंत्री सुभाष देसाई यांनी अन्नपुरवठ्यासाठी मदत केली आहे, असे शिवसेनेचे दक्षिण मुंबई विभागप्रमुख संतोष शिंदे यांनी सांगितले. दरम्यान, मराठा आरक्षणाचा मुद्दा लवकरात लवकर निघावा, अशी आमची अपेक्षा आहे; पण आंदोलन करीत असताना या आंदोलकांची गैरसोय होऊ नये म्हणून त्यांच्या जेवणाची व्यवस्था करण्यात आली आहे, अशी माहिती संतोष शिंदे यांनी दिली.