उपायुक्तांना बडतर्फीचा अधिकार नाही!
हवालदाराला दोन आठवड्यांत रुजू करण्याचे आदेश
सकाळ वृत्तसेवा
मुंबई, ता. ३ ः पोलिस उपायुक्तास त्याच्याखालील अधिकारी, अंमलदारांना बडतर्फ करण्याचा अधिकार नाही, असे स्पष्ट करीत एका पोलिस हवालदाराला दोन आठवड्यांत सेवेत रुजू करून घेण्याचे आदेश नुकतेच महाराष्ट्र प्रशासकीय न्यायाधिकरणाने (मॅट) दिले.
विवाहबाह्य संबंधाच्या आरोपात अर्जदार हवालदाराविरोधात २०१७मध्ये गुन्हा दाखल झाला. आरोपपत्रही दाखल झाले. आरोप सिद्ध झाल्याने त्याला परिमंडळ-३च्या तत्कालीन उपायुक्तांनी सेवेतून बडतर्फ केले. या आदेशाविरोधात हवालदाराने अतिरिक्त महासंचालक (प्रशासन) आणि गृह विभागाकडे अपील केले; मात्र ते अपील दोन्ही पातळ्यांवर फेटाळण्यात आले. त्यानंतर हवालदाराने मॅटमध्ये याचिका केली. महाराष्ट्र पोलिस अधिनियमातील २५(२) नुसार पोलिस कर्मचारी, अंमलदारांना बडतर्फ करण्याचा अधिकार उपायुक्तांना नाही, हा मुद्दा हवालदाराने लावून धरला. त्याशिवाय तपास प्रक्रियेतील त्रुटीही समोर ठेवल्या. हा मुद्दा ग्राह्य धरीत मॅटने वरील आदेश दिले.