ईद-ए-मिलादनिमित्त
रस्ते वाहतुकीत बदल
मुंबई, ता. ४ : येत्या ८ सप्टेंबर रोजी मुंबईत ईद-ए-मिलादच्या मिरवणुका निघणार आहेत. मानखुर्द आणि घाटकोपर भागात मिरवणुकांमध्ये मोठ्या प्रमाणात गर्दी होण्याची शक्यता आहे. ही बाब लक्षात घेता वाहतूक पोलिसांनी कुर्ला आणि विक्रोळी यादरम्यानच्या एलबीएस मार्गावरून प्रवास टाळण्याचा सल्ला दिला आहे. कायदा-सुव्यवस्था आणि सुरक्षितता राखण्यासाठी वाहनचालकांना मुंबई वाहतूक पोलिसांना सहकार्य करण्याचे आवाहन केले आहे. अवजड वाहनांसाठी (मिरवणुकीतील वाहने आणि बेस्ट बसेस वगळून) छेडा नगर जंक्शन ते मानखुर्द टी जंक्शन मार्ग बंद असेल. हलकी वाहने घाटकोपर-मानखुर्द लिंक रोडने जातील, अशी माहिती पोलिसांनी दिली.
---
पर्यायी मार्ग कोणते?
- छेडानगरहून वाशीला जाणाऱ्या वाहनांनी उमरशी बाप्पा जंक्शन आणि व्ही.एन.पुरव मार्गाचा वापर करावा.
- मानखुर्द टी जंक्शन ते घाटकोपर किंवा विक्रोळीवरून येणाऱ्या वाहनांनी उमरशी बाप्पा जंक्शन आणि व्ही.एन.पुरव मार्गाचा वापर करावा.
- पवई गांधी नगर जंक्शनवरून दक्षिण मुंबईत जाणारी वाहने जेव्हीएलआर, विक्रोळी मार्गे वळवण्यात आली आहेत.
- श्रेयस जंक्शन आणि सावित्री बाई फुले जंक्शनवरील वाहने पूर्व द्रुतगतीमार्गे पंतनगरला वळवण्यात आली आहेत.