भाजपने सर्वांनाच गंडवले आहे!
ॲड. प्रकाश आंबेडकर यांची टीका
सकाळ वृत्तसेवा
मुंबई, ता. ४ : राज्य सरकारने मराठा समाजाला ‘कुणबी’ संबोधण्याचा जीआर काढून मोठा गाजावाजा केला. हा निर्णय जणू काही तोडगा काढल्यासारखा सादर करून भाजपने समाजाची दिशाभूल केली आहे, अशी टीका वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी केली.
मुंबईत आयोजित पत्रकार परिषदेत आंबेडकर म्हणाले, की भाजपने मराठा आरक्षणासाठीची नेमलेली शासकीय उपसमिती, न्या. शिंदे समिती, मराठा समाज, मनोज जरांगे पाटील आणि कुणबी या सर्वांना फसवले आहे. मुंबई उच्च न्यायालयातील ‘जगन्नाथ डी. होल विरुद्ध महाराष्ट्र सरकार’ या प्रकरणात न्यायालयाने सर्व मराठा समाजाला कुणबी संबोधता येणार नसल्याचे म्हटले आहे. कुणबी ही जात नसून व्यवसाय आहे, असेही त्यात नमूद आहे. हा निर्णय सर्वोच्च न्यायालयात टिकला असून, त्यामुळे सरकारचा हा जीआर चुकीचा आणि दिशाभूल करणारा आहे. ओबीसी समाजाला आता स्वतःच्या हक्कासाठी लढा द्यावा लागेल.