विसर्जन मिरवणुकीत विजेचा धक्का
साकीनाक्यात एकाचा मत्यू; पाच जखमी

सकाळ वृत्तसेवा
मुंबई, ता. ७ : साकीनाका परिसरात रविवारी (ता. ७) सकाळी भीषण दुर्घटना घडली. खैरानी रोड साकीनाका, कुर्ला येथे गणेश विसर्जनाच्या मिरवणुकीदरम्यान लटकत्या विद्युततारेचा स्पर्श गणेशमूर्तीला झाल्याने सहा भाविकांना विजेचा धक्का बसला. त्यात एकाचा मत्यू झाला, तर पाच जण जखमी झाले.
स्थानिकांनी तत्काळ सर्वांना जवळच्या खासगी रुग्णालयात दाखल केले. ३६ वर्षीय बिनू सुकुमारन कुमारन या तरुणाला तेथून सेवन हिल्स रुग्णालयात नेण्यात आले असता डॉक्टरांनी त्याला मृत घोषित केले, अशी माहिती सेवन हिल्स हॉस्पिटलकडून देण्यात आली. दरम्यान, पाच जखमींवर उपचार सुरू असून, सर्वांची प्रकृती स्थिर आहे. या घटनेमुळे परिसरात एकच खळबळ उडाली असून, साकीनाका पोलिस ठाण्यातून याची नोंद घेण्यात आली आहे. जखमींमध्ये शुभांशू कामत (२० वर्षे), तुषार गुप्ता (२०), धर्मराज गुप्ता (४९), करण कनोजिया (१४) आणि अनुश गुप्ता (६) यांचा समावेश आहे.