सलमान गोळीबारप्रकरणी ॲड. मुळे विशेष सरकारी वकील

मुंबई, ता. १० ः अभिनेता सलमान खान याच्या निवासस्थानी झालेल्या गोळीबार प्रकरणात राज्य सरकारने ॲड. महेश मुळे यांची विशेष सरकारी वकील म्हणून नियुक्ती केली आहे. तसे आदेश विधी व न्याय विभागाने गेल्या आठवड्यात जारी केले.
गेल्या वर्षी १४ एप्रिलला वांद्रे येथील गॅलॅक्सी अपार्टमेंटमधील सलमानच्या घरावर दुचाकीवरून आलेल्या आरोपींनी बेछूट गोळीबार केला. गुन्हे शाखेने तपास करून जुलै महिन्यात कुख्यात लॉरेन्स बिश्नोई टोळीतील अटक व फरार आरोपींविरोधात विशेष मोक्का न्यायालयात आरोपपत्र दाखल केले. अटक आरोपीच्या चौकशीतून पुढे आलेल्या माहितीसोबत सलमानसह एकूण ४६ साक्षीदारांचे जबाब पुरावा म्हणून आरोपपत्राद्वारे न्यायालयासमोर ठेवले आहेत. बहुचर्चित बाबा सिद्दिकी हत्या प्रकरणातही ॲड. महेश मुळे विशेष सरकारी वकील म्हणून कामकाज पाहत आहेत.