जेएनपीएतून कोट्यवधी पाकिस्तानी सौंदर्यप्रसाधने, खारीक जप्त
मुंबई, ता. १३ : पहलगाम हल्ल्यानंतर केंद्र सरकारने बंदी घातली असूनही पाकिस्तानमध्ये उत्पादित वस्तू, शेतमाल आणि जिन्नस चोरट्या वाटेने भारतात सर्रास दाखल होत असल्याचे महसूल गुप्तचर संचालनालयाने (डीआरआय) केलेल्या ताज्या कारवाईतून स्पष्ट झाले आहे. डीआरआयने जेएनपीए बंदरात उतरलेली १२ कोटींची सौंदर्यप्रसाधने आणि खारीक जप्त केले. डीआरआय प्रवक्त्याने शुक्रवारी (ता. १२) दिलेल्या माहितीनुसार ऑपरेशन डीप मॅनिफेस्टअंतर्गत अलीकडेच जेएनपीए बंदरात छापा घालून ही जप्ती करण्यात आली.
केंद्र सरकारने २ मे रोजी पाकिस्तानमधील कोणत्याही वस्तूच्या प्रत्यक्ष, अप्रत्यक्ष आयातीवर सरसकट बंदी घातली आहे. हे आदेश झुगारून भारतातील तीन व्यापाऱ्यांनी हा माल आयात केला. कारवाई टाळण्यासाठी हा माल अरब अमिरातीचा असल्याचे भासविण्यात आले आणि दुबईच्या बंदरातून भारतात धाडण्यात आला. प्रत्यक्षात हा माल पाकिस्तानी असल्याचे तपासात स्पष्ट झाले, असे या प्रवक्त्याने सांगितले. याप्रकरणी दुबईस्थित भारतीय पुरवठादारास अटक करण्यात आली आहे. तर एका सीमाशुल्क दलालास ताब्यात घेण्यात आले आहे. जुलैपासून सुरू झालेल्या या मोहिमेत आतापर्यंत एकूण ६७ कंटेनरमधील १,९१५ मेट्रिक टन माल जप्त करून तीन जणांना अटक करण्यात आली.