ऐरोली पुलावर पोलिसांनी
वाचवला तरुणीचा जीव
मुंबई, ता. १९ : ऐरोली खाडीपुलावरून आत्महत्येच्या प्रयत्नात असलेल्या २० वर्षीय तरुणीचे मन विक्रोळी पोलिसांनी संभाषण कौशल्याने वळवले आणि तिचा जीव वाचवला. ही घटना १६ सप्टेंबरला रात्री घडली. विक्रोळी पोलिसांनी दिलेल्या माहितीनुसार, ही तरुणी ऐरोली येथे आईसोबत राहते. वैयक्तिक आणि कौटुंबिक कारणांमुळे ती तणावग्रस्त होती. ती रात्री पुलाकडे जात असताना रिक्षाचालकाने तिला पाहिले. त्याला संशय आल्याने टोलनाक्यावर बंदोबस्तासाठी तैनात पोलिसांना ही माहिती दिली. त्यानंतर उपनिरीक्षक नितीन खंदारे आणि पथकाने तातडीने पूल गाठला. ती पुलावरून खाडीत उडी मारणार इतक्यात खंदारे यांनी तिला रोखले.