श्रीसिद्धिविनायक मंदिरात सोन्याच्या अलंकारांचा लिलाव
सकाळ वृत्तसेवा
मुंबई, ता. २९ : प्रभादेवी येथील श्रीसिद्धिविनायक गणपती मंदिर न्यासामार्फत भक्तांनी अर्पण केलेल्या सोन्याच्या अलंकारांचा जाहीर लिलाव आयोजित करण्यात आला आहे. दसऱ्याच्या शुभमुहूर्तावर गुरुवारी (ता. २) सकाळी १० ते सायंकाळी ५ या वेळेत मंदिराच्या आतील परिसरात हा लिलाव होणार आहे.
लिलावासाठी उपलब्ध असलेले अलंकार हे सोन्या, चांदीचे आहेत. यात गणेश प्रतिमा, लॉकेट्स, मोदक, अंगठ्या, सोन्याच्या साखळ्या, हार आदींचा समावेश आहे. लिलावाच्या दिवशी हे सर्व अलंकार मंदिराच्या आवारात प्रदर्शनार्थ ठेवण्यात येतील. ही संपूर्ण प्रक्रिया शासन नियमांनुसार होणार असल्याचे मंदिर न्यासाने स्पष्ट केले आहे.
न्यासाच्या कार्यकारी अधिकारी वीणा पाटील यांनी सांगितले की, श्रीचरणी अर्पण झालेल्या अलंकारांचा उपयोग भक्तांच्या कल्याणासाठी व पारदर्शक पद्धतीने होण्यासाठी हा लिलाव आयोजित करण्यात आला आहे. लिलावास येणाऱ्या सर्व भक्तांना आम्ही मनःपूर्वक आमंत्रित करतो. ही परंपरा भक्तिभाव वाढवणारी असून, त्यातून मिळणारी रक्कम समाजोपयोगी कार्यासाठी वापरली जाईल, असे त्‍यांनी सांगितले.
चांदीच्या नाण्यांच्या विक्रीसह लिलावाशी संबंधित सर्व अधिकार न्यासाकडेच राखीव असतील. भक्तांनी मोठ्या संख्येने या लिलावात सहभागी व्हावे, असे आवाहन श्रीसिद्धिविनायक मंदिर व्यवस्थापन समितीने केले आहे.