लोकांना समृद्ध करणाऱ्या
अर्थतंत्रज्ञानाची निर्मिती व्हावी!
फिनटेक महोत्सवात मोदींचे प्रतिपादन
सकाळ वृत्तसेवा
मुंबई, ता. ९ ः एआय म्हणजे ऑल इन्क्लुझिव्ह अर्थातच सर्वांचा समावेश ही भारताची खरी व्याख्या आहे. लोकांना समृद्ध करेल, अशा अर्थतंत्रज्ञानयुक्त जगाची निर्मिती करणे हे आमचे उद्दिष्ट आहे, असे प्रतिपादन पंतप्रधान नरेंद्र मोदी यांनी आज जागतिक फिनटेक महोत्सवात केले.
गेल्या दशकात भारताने डिजिटल तंत्रज्ञानाचे सार्वत्रिकीकरण केले. देशातील प्रत्येक नागरिकाला आणि देशातील प्रत्येक भागात उपलब्ध होईल, असे रूप तंत्रज्ञानाला दिले. तंत्रज्ञान हे केवळ साधनसुविधा नसून तो समानतेचा मार्ग असल्याचेही आम्ही दाखवून दिले. आम्ही इतर देशांंना तंत्रज्ञान देताना त्या देशांना ते विकसित करण्यासाठी मदतही करतो, हे डिजिटल सक्षमीकरण आहे. सध्या भारताची अर्थतंत्रज्ञानविषयक साधने जगात महत्त्वाची झाली आहेत, असेही मोदी यांनी स्पष्ट केले.