क्रिकेटपटू रिंकू सिंहला धमकी

मुंबई, ता. ९ ः माजी आमदार जिशान सिद्दीकी यांना खंडणीसाठी धमकावणाऱ्या व्यक्तीने क्रिकेटपटू रिंकू सिंह यालाही धमकावल्याचा दावा गुन्हे शाखेने न्यायालयात सादर केलेल्या आरोपपत्रात केला आहे.

सिद्दीकी यांना १० कोटींच्या खंडणीसाठी धमकावणाऱ्या मोहम्मद दिलशाद नावेद ही व्यक्ती त्रिनिदाद बेटावर असल्याचा सुगावा गुन्हे शाखेने लावला. तेथील पोलिस यंत्रणेद्वारे या व्यक्तीस अटक करण्यात आली. ऑगस्टमध्ये प्रत्यार्पण प्रक्रिया पार पडली. तपासादरम्यान या व्यक्तीने रिंकू याच्याकडेही पाच कोटींची खंडणी मागितली होती, अशी माहिती पुढे आली. आरोपीने रिंकूचे पीआर पाहणाऱ्या व्यक्तीस धमकीचे संदेश पाठवले होते. त्यात डी कंपनी असा उल्लेख होता. प्रत्यक्षात आरोपीचा आणि दाऊद टोळीचा काहीही संबंध नसल्याचे गुन्हे शाखेच्या वरिष्ठ अधिकाऱ्याने स्पष्ट केले. त्रिनिदाद येथे मजुरी करणाऱ्या आरोपीने तेथे बसून थट्टेपोटी जिशान, रिंकू यांना धमकावल्याचे अन्य एका वरिष्ठ अधिकाऱ्याने सांगितले.