‘पॅट’ परीक्षेला सुरुवात

मुंबई, ता. १० ः राज्यातील दुसरी ते आठवीतील विद्यार्थ्यांसाठी संकलित मूल्यमापन चाचणी परीक्षा (पॅट-१) परीक्षा शुक्रवार (ता. १०)पासून सुरू झाली. पहिल्या दिवशी मराठीचा पेपर काही अपवाद वगळता सर्वत्र सुरळीत पार पडला असल्याची माहिती शालेय शिक्षण विभागाकडून देण्यात आले. ही परीक्षा सोमवार (ता. १३)पर्यंत चालणार आहे. शनिवारी (ता. ११) गणित आणि सोमवारी (ता. १३) इंग्रजी विषयाचे पेपर होणार आहेत. शुक्रवारी मराठी विषयासाठीच्या पेपरला ७० लाख ९० हजारांहून अधिक विद्यार्थ्यांनी उपस्थिती दर्शवली असल्याची माहिती ही शालेय शिक्षण विभागाकडून देण्यात आली. मुंबई विभागात असलेल्या मराठी माध्यमांच्या शाळांसह महापालिका स्थानिक स्वराज्य संस्थांच्या शाळांमध्ये ही परीक्षा सुरळीत पार पडली. केवळ काही अपवाद वगळता काही ठिकाणी प्रश्नपत्रिकांची कमतरता होती; परंतु त्यामुळे विद्यार्थ्यांना कोणताही त्रास झाला नाही, अशी माहितीही विभागाकडून देण्यात आली.