‘जेईई’ची मुख्य परीक्षा जानेवारीत

मुंबई, ता. २० : देशातील आयआयटी, आयआयएम आदी नामांकित संस्थांमध्ये अभियांत्रिकी प्रवेशासाठी अत्यावश्यक असलेल्या जेईई २०२६ या मुख्य संयुक्त प्रवेश परीक्षेच्या तारखा आणि त्याचे वेळापत्रक राष्ट्रीय परीक्षा एजन्सीने (एनटीए)कडून जाहीर करण्यात आले आहे. एनटीएकडून जेईई मेनच्या या प्रवेश परीक्षा दोन सत्रांमध्ये होणार आहेत. पहिले सत्र २१ ते ३० जानेवारीदरम्यान, तर दुसऱ्या सत्राची परीक्षा १ ते १० एप्रिलदरम्यान होणार आहे. पहिल्या सत्रासाठीची अर्जनोंदणी सुरू झाली असून, दुसऱ्या सत्राच्या परीक्षेसाठीचे अर्ज जानेवारी २०२६ अखेरपासून स्वीकारले जाणार असल्याची माहिती देण्यात आली. देशभरातील लाखो विद्यार्थ्यांची सोय व्हावी, यासाठी यंदा एनटीए अधिकाधिक शहरांमध्ये या परीक्षेची केंद्रे सुरू करणार आहे. यात यंदा पहिल्यांदाच लहान शहरांमध्येदेखील परीक्षा केंद्र मिळण्याची शक्यता आहे. या परीक्षेच्या अर्ज नोंदणीसाठीची आवश्यक लिंक https://jeemain.nta.nic.in या संकेतस्थळावर उपलब्ध करून देण्यात येणार असल्याचेही एनटीएकडून जाहीर करण्यात आले आहे. परीक्षेसाठी इच्छुक असलेल्या विद्यार्थ्यांनी संयुक्त प्रवेश परीक्षा २०२६ संदर्भातील अधिक माहिती आणि सूचनांसाठी नियमितपणे एनटीएचे अधिकृत संकेतस्थळ www.nta.ac.in आणि https://jeemain.nta.nic.in/ ला भेट देण्याचे आवाहन करण्यात आले आहे.