माहीममध्ये पाडकामावेळी
इमारतीचा भाग कोसळला
मुंबई, ता. २९ : माहीम येथील सेनापती बापट मार्गावर असलेल्या जॉन्सन अँड जॉन्सन इमारतीचा काही भाग बुधवारी दुपारी पाडकामावेळी कोसळला. या घटनेत दोन युवक किरकोळ जखमी झाले असून, त्यांच्यावर रुग्णालयात उपचार सुरू आहेत.
अग्निशमन दलाने दिलेल्या माहितीनुसार, बुधवारी दुपारी १.४८ वाजता खासगी कंत्राटदाराकडून इमारतीचे पाडकाम सुरू होते; मात्र कामावेळी पहिला आणि दुसरा मजला अचानक कोसळला. काही भाग खाली पडला, तर काही भाग धोकादायक अवस्थेत लोंबकळत राहिला. कोसळलेल्या इमारतीचा काही भाग जेसीबी मशीनवर आणि शेजारच्या चारचाकी वाहनावर पडला. घटनेबाबत कळताच अग्निशमन दलाने तत्काळ घटनास्थळी धाव घेत परिसर मोकळा केला. या दुर्घटनेत दोन युवक जखमी झाले असून, शाहरुख खान (वय २४) आणि मोहम्मद अयूब (वय २४) या जखमी दोघांनाही रहेजा रुग्णालयात उपचारासाठी दाखल करण्यात आले असून, त्यांची प्रकृती स्थिर असल्याचे रुग्णालयाच्या मुख्य वैद्यकीय अधिकाऱ्यांनी कळवले आहे.