रोहित पवार यांच्याविरोधात भाजपची पोलिस तक्रार

मुंबई, ता. २९ : राष्ट्रवादी शरद पवार गटाचे आमदार रोहित पवार यांच्याविरोधात भाजपने तक्रार दाखल केली असून, त्याआधारे सायबर पोलिसांनी (दक्षिण विभाग) मंगळवारी गुन्हा नोंदवला आहे. मात्र प्रथम खबरी अहवालात (एफआयआर) रोहित पवार यांचा आरोपी म्हणून उल्लेख नाही. तपासानंतर आरोपी निष्पन्न केले जातील, असे पोलिस दलातील वरिष्ठ अधिकाऱ्याने स्पष्ट केले.
१६ ऑक्टोबरला रोहित पवार यांनी पत्रकार परिषद घेतली होती. त्यात त्यांनी जाहीररीत्या बनावट कागदपत्रांच्या आधारे अमेरिकेचे अध्यक्ष डोनाल्ड ट्रम्प यांचे खोटे आधार कार्ड बनवण्याचे प्रात्यक्षिक दाखवले होते. पवार यांच्या या देशविरोधी कृत्यामुळे दोन समूह एकदुस-याविरोधात अपराध करण्यास प्रवृत्त होतील, अशी तक्रार भाजपाचे सोशल मीडिया सहसंयोजक धनंजय वागस्कर यांनी सायबर पोलिस ठाण्यात केली.