मालकाच्या घरात मोलकरणीची आत्महत्या

मुंबई , ता. ४ चोरीचा आळ घेतल्याने व्यथित झालेल्या मोलकरणीने मालकाच्याच घरात गळफास घेतला. मंगळवारी सकाळी या घटनेला वाचा फुटताच अँटॉप हिल पोलिसांनी अपघाती मृत्यूची नोंद घेत तपासाला सुरुवात केली आहे. चोईसांग तमांग (२७) असे मृत मोलकरणीचे नाव असून, ती मूळची दार्जिलिंगची असल्याचे पोलिसांनी सांगितले. दरम्यान, घटनास्थळी या मोलकरणीने मृत्यूपूर्वी लिहिलेली चिठ्ठी सापडली आहे. त्यात मी प्रामाणिक असून, चोरी केलेली नाही, असे नमूद असल्याचे पोलिसांकडून सांगण्यात आले. त्यांना मिळालेल्या माहितीनुसार, गेल्या दोन वर्षांपासून तमांग अँटॉप हील येथील आशियाना सोसायटीत तिसऱ्या मजल्यावर राहणाऱ्या ७२ वर्षीय ज्येष्ठ नागरिकाच्या घरी वास्तव्यास होती. काही दिवसांपूर्वी मालकाचे १० लाखांचे दागिने गायब झाले. त्याने चोरीचा आळ तमांगवर घेतला होता. त्यामुळे तिने व्यथित होत या घराच्या बाल्कनीत गळफास घेत आत्महत्या केली. मंगळवारी सकाळी हा प्रकार उघडकीस झाला. दरम्यान, मालकाने चोरीची तक्रार पोलिस ठाण्यात केलेली नसल्यामुळे तमांगच्या आत्महत्येमागे अन्य कारण आहे का याचा तपास सुरू असल्याचे अँटॉप हिल पोलिस ठाण्याचे वरिष्ठ पोलिस निरीक्षक शिवाजी पावडे यांनी सांगितले.