चेंबूरमधील इमारतीला आग

मुंबई, ता. १० : चेंबूर येथील सायन-ट्रॉम्बे मार्गावरील थॉमस कुक कॉर्पोरेट पार्क या इमारतीत सोमवारी (ता. १०) पहाटे दीड वाजण्याच्या सुमारास आगीची घटना घडली. या आगीची माहिती मिळताच अग्निशमन दलाने घटनास्थळी तत्काळ धाव घेतली. ही आग सुरुवातीला लेव्हल-१ होती; परंतु काही वेळातच अग्निशमन दलाने ही आग लेव्हल-२ची घोषित केली. ही आग इमारतीच्या दुसऱ्या मजल्यावरील २००० चौरस फूट क्षेत्रात पसरली होती. विद्युत वायरिंग फर्निचर, रेकॉर्डस्‌, यू.पी.एस. बॅटरी आणि लाकडी दरवाजे या आगीत खाक झाल्याचे सांगण्यात आले. अग्निशमन दलाने सकाळी साडेचार वाजण्याच्या सुमारास या आगीवर नियंत्रण मिळविले. या घटनेत कोणतीही दुखापत किंवा जीवितहानी झालेली नाही. या आगीचे नेमके कारण अद्याप समजलेले नसल्याची माहिती अग्निशमन दलाने दिली.