वृद्ध व्यावसायिकास आभासी अटक

मुंबई : मध्य मुंबईत राहणाऱ्या शिपिंग आणि लॉजिस्टिक क्लिअरिंगचा व्यवसाय करणाऱ्या ज्येष्ठ नागरिकास आभासी अटकेत ठेवून सायबर भामट्यांनी ५३ लाख रुपये उकळले. आरोपींनी ३ नोव्हेंबर रोजी तक्रारदारास आपल्या सिम कार्डवरून चुकीचे संदेश गेल्याने दिल्ली येथे गुन्हा नोंद झाल्याचे सांगून दोन तासांत चौकशीस हजर राहण्याबाबत बजावण्यात आले. या प्रकरणाच्या तपासासाठी भामट्यांनी बँक खात्यातील सर्व जमा रक्कम अन्य खात्यात वळती करण्यास सांगितले. कारवाईच्या भीतीपोटी तक्रारदाराने ५३ लाख वळते केले. पुढे पोलिस असल्याचे भासवून संपर्कात असलेल्या व्यक्तींनी फोन बंद केला, तेव्हा या वृद्धास फसवणुकीची जाणीव झाली, असे पोलिसांनी सांगितले. याप्रकरणी सोमवारी (ता. १०) सायबर पोलिसांनी गुन्हा नोंदवून तपास सुरू केला आहे.