मुंबई ः कौटुंबिक वादातून पत्नीची हत्या करत पतीने आत्महत्या केल्याची घटना गुरुवारी वांद्रे पूर्वेकडील बेहरामनगर परिसरात घडली. याप्रकरणी निर्मलनगर पोलिसांनी मृत पतीविरोधात हत्येचा गुन्हा नोंदवला. नजमा उर्फ नाजो वारसी आणि नवाब वारसी अशी मृतांची नावे आहेत. पोलिसांनी दिलेल्या माहितीनुसार, नवाब रिक्षा चालक होता. रिक्षा चालवून पैसे कमावण्याऐवजी तो अनेकदा घरीच थांबत असे. त्यावरून या दोघांचे खटके उडत. घरखर्चाला पैसे देण्यावरून दोन आठवड्यांपासून त्यांच्यात जोरदार वाद सुरू होते. त्यामुळे रागाच्या भरात नजमा माहेरी निघून गेली. नवाबने समजूत काढून तिला घरी आणले; मात्र गुरुवारी त्यांच्यात पुन्हा वाद झाला. रागाच्या भरात नवाबने नजमाची हत्या केली. त्यानंतर स्वतःवरही वार करून घेत आत्महत्या केली.