६,८३४ नावे चुकीच्या प्रभागात

मुंबई, ता. ३० ः महापालिका निवडणुकीसाठी प्रकाशित करण्यात आलेल्या मसुदा मतदार यादीत मोठी त्रुटी समोर आली आहे. कुर्ला एल-वाॅर्डमध्ये तब्बल ६,८३४ मतदारांचे चुकीच्या प्रभागात वर्गीकरण झाल्याचे समोर आले आहे. आरटीआय कार्यकर्ते अनिल गलगली यांनी ही गंभीर बाब निदर्शनास आणून दिली आहे. गलगली यांनी एल-वाॅर्डच्या सहाय्यक आयुक्तांकडे दिलेल्या निवेदनात नमूद केले, की मसुदा यादीत प्रभाग १६२ मध्ये असलेले लिस्ट पार्ट्स चुकीने प्रभाग १६३ मध्ये दाखविण्यात आले आहेत. अलीकडील प्रभाग रचना बदलानुसार हे लिस्ट पार्ट्स १६२ प्रभागात वर्गीकृत होणे आवश्यक होते. प्रशासनाने ही चूक तातडीने दुरुस्त करण्याची मागणी गलगली यांनी केली आहे.