पोलिसांचे पगार
आता बडोदा बँकेत
खाती उघडण्याची प्रक्रिया सुरू
मुंबई, ता. ३ ः मुंबई पोलिस दलातील तब्बल ४५ हजार अधिकारी, कर्मचाऱ्यांचा पगार आता सार्वजनिक क्षेत्रातील बँक ऑफ बडोदात होणार आहे. त्यासाठी या बँकेत खाती उघडण्यासाठी सर्वांकडून आवश्यक तपशील मागविण्यात आले आहेत. ही प्रक्रिया पूर्ण होण्यासाठी आणखी दोन ते तीन महिन्यांचा कालावधी जाईल, असे सांगण्यात आले.
२००३ ते २०२० या काळात मुंबई पोलिस दलाचा पगार ॲक्सिस बँकेतून होत होता. पुढे तो एचडीएफसी बँकेत वळवण्यात आला. एचडीएफसी बँकेसोबतचा करार संपल्यानंतर अन्य बँकांकडून प्रस्ताव मागविण्यात आले. त्यात बँक ऑफ बडोदाचा प्रस्ताव मंजूर करण्यात आला. या बँकेने वेतन खात्यांवर पोलिसांना कौटुंबिक वैद्यकीय विमा सुविधा देण्याचे प्रस्तावात नमूद केल्याने तो मंजूर करण्यात आल्याचे एका वरिष्ठ अधिकाऱ्याने सांगितले.
प्रस्ताव मंजूर केल्यानंतर अतिरिक आयुक्त स्तरावर अखत्यारीतील सर्व पोलिस अधिकारी, अंमलदारांचे नवी खाती सुरू करण्यासाठी तपशील आणि आवश्यक कागदपत्रे मागविण्यात आली. निम्म्या पोलिस दलाने तपशील सादर केले आहेत, असे या अधिकाऱ्याने स्पष्ट केले.