३११ फलकांवर
पालिकेची कारवाई

सकाळ वृत्तसेवा
​मुंबई, ता. १८ ः निवडणूक आचारसंहितेची प्रभावी अंमलबजावणी करण्यासाठी महापालिकेने आपली कारवाई तीव्र केली आहे. गुरुवारी (ता. १८) प्रसिद्ध केलेल्या अहवालानुसार, मुंबईतील विविध विभागांत सार्वजनिक आणि खासगी मालमत्तांवरील विद्रुपीकरण रोखण्यासाठी पालिकेच्या परवाना विभागाने मोठी मोहीम राबवली. आतापर्यंत याप्रकरणी १९६ गुन्हे नोंदवण्यात आले आहेत, अशी माहिती अधीक्षक (परवाना) अनिल काटे यांनी स्पष्ट केले आहे.
​
मुंबईत सार्वजनिक आणि खासगी जागांवरून एकूण ३११ बेकायदा प्रचार साहित्य हटवण्यात आले आहे. यामध्ये प्रामुख्याने बॅनर, पोस्टर्स आणि झेंड्यांचा समावेश आहे.​ पालिकेने सार्वजनिक ठिकाणांहून १९७ बेकायदा वस्तू हटवल्या. यात सर्वाधिक ११० बॅनर आणि ५६ झेंड्यांचा समावेश आहे. ​खासगी इमारती किंवा भिंतींवरील विद्रुपीकरणाप्रकरणी ११४ प्रकरणांवर कारवाई करण्यात आली आहे.
जी उत्तर विभाग येथे सार्वजनिक ठिकाणी सर्वाधिक ४४ बॅनर आणि झेंडे हटवण्यात आले. आर मध्य विभाग येथे ६५ ठिकाणी कारवाई करण्यात आली. एम पश्चिम विभाग येथे ६८ खासगी मालमत्तांवरील पोस्टरवर कारवाई झाली. एफ उत्तर, के पूर्व, पी उत्तर आणि एल विभागांमध्येही आचारसंहिता कक्षाने धडक कारवाई केली आहे.